ଚିତ୍ତରଞ୍ଜନ ନାୟକ ସମସାମୟିକ ଓଡ଼ିଆ କବିତାର ଅନ୍ୟତମ ଶକ୍ତିଶାଳୀ ଯୁବସ୍ୱର। ମୁକ୍ତ ଦୃଷ୍ଟି ଓ ଭୁକ୍ତ ଅନୁଭବ ତାଙ୍କ କବିତାରେ ପ୍ରାଣସଂଚାର କରେ। ରୂପକ ଓ ଉପମା ପ୍ରୟୋଗରେ ତାଙ୍କର ବିଚକ୍ଷଣତା ପାଠକଙ୍କୁ ଦଣ୍ଡେ ଅଟକାଇଦିଏ। ‘ମାଟି ଛୁଇଁନଥିବା ସୂର୍ଯ୍ୟୋଦୟ’, ‘ଡାକୁଛ ବୋଲି ଜାଣେ’ ଓ ‘ଆସୁଛ ବୋଲି ଜାଣେ’ର କବି ଭାବେ ସୁପରିଚିତ ଚିତ୍ତରଞ୍ଜନଙ୍କ ‘ଲିଜା ମିଶ୍ର ଓ ଅନ୍ୟାନ୍ୟ କବିତା’ ପ୍ରେମଜ ଶିହରଣର ଏକ ଅନ୍ତରଙ୍ଗ ପ୍ରତୀକ। କେବଳ ପ୍ରେମ ନୁହେଁ, ଜୀବନ ପ୍ରତି ମିତ୍ରଦୃଷ୍ଟି ଓ ଅସଂଗତି ପ୍ରତି କ୍ଷୋଭ ତାଙ୍କ କବିତାକୁ ଯୁଗପତ୍‍ ନରମ-ଗରମ କରି ଗଢ଼ି ତୋଳେ। ଯେଉଁମାନେ ଜୀବନରେ ଥରେଅଧେ ପ୍ରେମର ରାସ୍ତାରେ ଚାଲିଛନ୍ତି, ସେମାନେ ଚିତ୍ତରଞ୍ଜନଙ୍କ ଲିଜା ମିଶ୍ରକୁ ଥରେ ଅନ୍ତତଃ ଏ ବହିରେ ଭେଟିବା ଉଚିତ୍‍। - ସରୋଜ ବଳ