ଜ୍ଞାନୀ ଦେବାଶିଷ ମିଶ୍ର (୧୯୮୫) ନୂଆ ପିଢ଼ିର ଜଣେ ପଲ୍ଲବିତ ପ୍ରତିଭା । କବିତାରେ ସେ ଯେପରି ସ୍ୱଚ୍ଛନ୍ଦ ଓ ସଂପ୍ରସାରିତ, ସମାଲୋଚନାରେ ମଧ୍ୟ ସେ ସେପରି ପ୍ରବୀଣ ଓ ସ୍ୱୟଂପୁଷ୍ଟ । ଅତିରିକ୍ତ ଭାବେ ଗାୟନଧର୍ମୀ କବିତା ଓ ଗଜଲ ସହିତ ବେତାର ପାଇଁ ସଙ୍ଗୀତ-ରୂପକ ରଚନା ତାଙ୍କ ସର୍ଜନଶୀଳତାକୁ ବହୁମୁଖୀ କରେ । ୨୦୧୪ରେ ପ୍ରକାଶିତ ‘ଦାଗ’ ସଂକଳନ ମୌଳିକ କାବ୍ୟିକ ପରିଚର୍ଯ୍ୟା ତଥା ପ୍ରସାରିତ ଦୃଷ୍ଟିବୋଧ ଯୋଗୁଁ ବେଶ୍‍ ପାଠକୀୟ ଆଦୃତି ଲାଭ କରିଥିଲା । ୨୦୧୬ରେ ସାହିତ୍ୟ ଅକାଦେମୀ ଯୁବ ପୁରସ୍କାର ପାଇବା ପରେ ଏହା ହେଉଛି ପୁସ୍ତକଟିର ଦ୍ୱିତୀୟ ସଂସ୍କରଣ । ଦାଗମୟ ସମୟ ଓ ଜୀବନରେ ନିଜକୁ ନିର୍ଦାଗ କରିବାର ଅହରହ ପ୍ରୟାସ ଓ ପ୍ରସ୍ତାବନାକୁ ଆଧାର କରି ରଚିତ ସଂକଳନସ୍ଥ କବିତାଗୁଡ଼ିକ କେବଳ ଆମ ସମୟ ପାଇଁ ନୁହେଁ, ଭବିଷ୍ୟତ ପିଢ଼ି ପାଇଁ ମଧ୍ୟ ଆଲୋକବର୍ତ୍ତିକା ହେବ, ସନ୍ଦେହ ନାହିଁ ।