ମୃତ୍ୟୁ କଣ କେବଳ ଜୀବନ ଶେଷରେ ଆସେ; ଜୀବନ ଭିତରେ ଆସେନା ବାରଂବାର? ମୃତ୍ୟୁ କଣ ଜୀବନର ଆରପାଖ ଏକ ଗ୍ରହ; ଯେଉଁଠି ଆଦୌ ନାହିଁ ଜୀବନର ବିଗ୍ରହ? ମୃତ୍ୟୁ କଣ ଖାଲି ‘ମୃତ୍ୟୁ’ର କଥା କହେ; ତା ଭିତରେ ବିଲକୁଲ୍‍ ଜୀବନ ନଥାଏ? ମୃତ୍ୟୁକୁ ନେଇ ଅନେକ ପ୍ରଶ୍ନ, ଅନେକ ସନ୍ଦେହ, ଅନେକ ରହସ୍ୟ। ବିଜ୍ଞାନର ହଜାରେ ଆବିଷ୍କାର ଓ ଉଦ୍‍ଭାବନ ପରେ ବି ମୃତ୍ୟୁ ଅମର ହୋଇ ରହିଛି ଓ ଜୀବନ ହୋଇ ରହିଛି ମରଣଶୀଳ। ବୋଧେ ସେଇ ମରଣଶୀଳତା ହିଁ ଜୀବନକୁ ଦେଇଛି ଅମୃତ। ସେଇ ମୃତ୍ୟୁ ହିଁ ବଢ଼ାଇଛି ଜୀବନର ବଜାର ଦର। ମୃତ୍ୟୁଚେତନାକୁ ନେଇ ଅନେକ ଅଦ୍ଭୁତ ଓ ଚମତ୍କାର ଗପ ଲେଖାଯାଇଛି ଓଡ଼ିଆ ସାହିତ୍ୟରେ ଓ ମୃତ୍ୟୁ ଯେ ଏତେ କଳାତ୍ମକ ଦିଶିପାରେ, ପ୍ରମାଣିତ ହୋଇଛି ସେଇ ଗପଗୁଡ଼ିକରେ। ସେମିତିକିଛି ଗପକୁ ନେଇ ପ୍ରସ୍ତୁତ ଏଇ ବିଶେଷ ସଂକଳନ, ଯାହାର ପରିକଳ୍ପନା ଓ ପ୍ରୟାସ କରିଛନ୍ତି ଓଡ଼ିଶା ସାହିତ୍ୟ ଏକାଡେମୀ ପୁରସ୍କାରପ୍ରାପ୍ତ ଆମ ସମୟର ଦୁଇ ସୁଖ୍ୟାତ କଥାକାର ଦେବବ୍ରତ ମଦନରାୟ ଏବଂ ପବିତ୍ର ପାଣିଗ୍ରାହୀ। ‘ଗୋଧୂଳି ଗପ’ ପାଠକମାନଙ୍କ ଦ୍ଵାରା ଖୁବ୍‍ ଆଦୃତ ହେବ, ବିଶ୍ଵାସ ଅଛି।