ଦୁଇ ଦଶନ୍ଧି ଧରି ଅଞ୍ଜନ ଚାନ୍ଦ କଥାମନସ୍କ। କେବେ ହାସ୍ୟବ୍ୟଙ୍ଗ ରଚନା ତ କେବେ ଲଘୁକଥା, କେବେ ପିଲାଙ୍କ ପାଇଁ ମଜାକଥା ତ କେବେ ବଡ଼ଙ୍କ ପାଇଁ ସିରିଅସ୍ ଗପ - ୟେସବୁ ତାଙ୍କର ସର୍ଜନାର ଚରାଭୂଇଁ। ଥଟ୍ଟାମଜାର କୁହୁକ କାହାଣୀ ଭିତରେ ମଂଜ ଥରାଇଦେବା ଭଳି ସମାଜଚେତନା ସେ ଯେପରି ଖୁନ୍ଦିଥାନ୍ତି, ତାହା ପାଠକକୁ ପ୍ରଲୁବ୍ଧ କରେ। ବ୍ୟଙ୍ଗରଚନା ‘ଅଜାଗା ବଥ’ ଓ ଶିଶୁସାହିତ୍ୟ ‘ମନଛୁଆଁ ଗପ’ ପରେ ‘ଗୋଟିଏ ଲୁଙ୍ଗି ଚୋରି ବୃତ୍ତାନ୍ତ’ ତାଙ୍କର ପ୍ରଥମ ସିରିଅସ୍ ଗଳ୍ପସଂକଳନ। ତେବେ କଥାକାର ଅଞ୍ଜନଙ୍କର ଅନ୍ୟଏକ ଲୋକପ୍ରିୟତା ରହିଛି ସ୍ତମ୍ଭରଚନାରେ। ଦୀର୍ଘ ଦିନ ଧରି ‘ଧରିତ୍ରୀ’ର ସ୍ତମ୍ଭକାର ଭାବେ ସେ ପାଠକଙ୍କ ନିକଟରେ ନିଜସ୍ୱ ମୌଳିକ ମନ୍ତବ୍ୟ ଓ ଅନୁଭବ ପରଶି ଚାଲିଛନ୍ତି।