କ୍ଷୀରୋଦ ପରିଡ଼ା ସମକାଳୀନ ଓଡ଼ିଆ ସାହିତ୍ୟର ଜଣେ ବହୁମୁଖୀ ପ୍ରତିଭା। କବିତା ତାଙ୍କର ପ୍ରଥମ ପସନ୍ଦ ହେଲେବି ଗଳ୍ପ, ଅନୁବାଦ, ଫିଚର, ସଂପାଦନା ଆଦି ବିଭାଗରେ ମଧ୍ୟ ତାଙ୍କର ଅତୁଳନୀୟ ଦକ୍ଷତା ରହିଛି। ମୁଖ୍ୟତଃ ପତ୍ରପତ୍ରିକାରେ ଦେଶବିଦେଶର ପ୍ରସିଦ୍ଧ ଲେଖକଙ୍କ କୃତିତ୍ୱ ଓ ବ୍ୟକ୍ତିତ୍ୱ ସଂପର୍କରେ ରୋଚକ ଉପସ୍ଥାପନା କରି ସେ ବେଶ୍‍ ପାଠକୀୟ ଆଦର ଲାଭ କରିଛନ୍ତି। ‘ନୋବେଲ ବିଜୟୀ କଥାକାରଙ୍କ ଆତ୍ମକଥନ’ ହେଉଛି ଶ୍ରୀ ପରିଡ଼ାଙ୍କର ପ୍ରଥମ ଫିଚର ପୁସ୍ତକ ଯାହା ନୋବେଲ ପୁରସ୍କାର ବିଜେତା କଥାଶିଳ୍ପୀମାନଙ୍କ ଉପରେ ଆଧାରିତ ଫିଚରଗୁଡ଼ିକର ସମାହାର। ଏଥିରେ ରହିଛି ଚଉଦ ଜଣ ନୋବେଲ ବିଜୟୀ କଥାକାରଙ୍କ ଉପରେ ରଚିତ ଫିଚର। ଏହି ବିଶ୍ୱକଥାକାରଙ୍କ ଉପରେ ଲେଖା ଯାଇଥିବା ଫିଚର ସହ ସଂଯୁକ୍ତ ହୋଇଛି ସେମାନଙ୍କ ‘ଆତ୍ମକଥନ’ ଯାହା ମୂଳତଃ ତାଙ୍କ କଥାଯାତ୍ରାର କାହାଣୀ ଓ ନାନାଦି ଅନୁଭବରେ ସମୃଦ୍ଧ। ଗଳ୍ପ ଓ ଉପନ୍ୟାସର ସଚେତନ ପାଠକ, ଲେଖକ ତଥା କଥାସାହିତ୍ୟର ଗବେଷକମାନଙ୍କ ପାଇଁ ପୁସ୍ତକଟି ଉପାଦେୟ ହେବ ନିଶ୍ଚୟ। - ସରୋଜ ବଳ