ସରୋଜିନୀ ସାହୁ (୧୯୫୬) ଓଡ଼ିଆ କଥାସାହିତ୍ୟର ଜଣେ ପ୍ରଭାବଶାଳୀ ସ୍ରଷ୍ଟା। ସମତୁଲ ନାରୀତ୍ୱର ପ୍ରତିଷ୍ଠା ଓ ସ୍ୱାଭିମାନ ପାଇଁ ନିରନ୍ତର ନିଜ ଗଳ୍ପ ଓ ଉପନ୍ୟାସରେ ପ୍ରୟାସ କରିଆସିଥିବା ଜଣେ ନିର୍ଭୀକା ଓ ନିଖୁଣ ଶିଳ୍ପୀ ସେ। ସାହିତ୍ୟରେ ନିଜ ସମୟକୁ ନିର୍ଭେଜାଲ୍‍ ଚିତ୍ରଣରେ ସାଇତିରଖିବା ତାଙ୍କର ଏକ ବଡ଼ ଲେଖକୀୟ ଗୁଣ। ବିଗତ ଚାରି ଦଶନ୍ଧିରୁ ଊର୍ଦ୍ଧ୍ୱକାଳ ଧରି ଓଡ଼ିଆ କଥାସାହିତ୍ୟକୁ ସିଦ୍ଧ ଓ ସମୃଦ୍ଧ କରିଆସିଥିବା ଡ. ସାହୁଙ୍କର ପ୍ରଥମ ଚାରୋଟି ଉପନ୍ୟାସକୁ ଏକାଠି କରି ‘ସୃଜନ ସମଗ୍ର’ ପ୍ରଥମ ଭାଗର ପରିକଳ୍ପନା। ଉପନ୍ୟାସର ଦୀକ୍ଷିତ ପାଠକ, ଗବେଷକ ଓ ଛାତ୍ରଛାତ୍ରୀଙ୍କ ପାଇଁ ଏହି ଗ୍ରନ୍ଥାବଳୀ ସଂଗ୍ରହଣୀୟ ହେବ ବୋଲି ଆଶା କରାଯାଏ।