ସ୍ତ୍ରୀସତ୍ତାକୁ ନେଇ ୧୦୮ଟି କବିତାର ମାଳା ହେଉଛି ‘ସ୍ତ୍ରୀଲୋକ’ ସଂକଳନ। ୧୯୯୭ରୁ ୨୦୨୨- ବିଗତ ୨୫ ବର୍ଷ ଭିତରେ ଲେଖାଯାଇଥିବା ଅସଂଖ୍ୟ କବିତାରୁ କେବଳ ୧୦୮ଟିକୁ ନେଇ ଗୁନ୍ଥାଯାଇଥିବା ଏଇ ମାଳାଟି ହୁଏତ ଅନେକଙ୍କୁ ଦ୍ୱନ୍ଦ୍ୱରେ ପକେଇପାରେ। ସେଇ ସମାନ ବିଷୟରେ ଏତେ ସଂଖ୍ୟକ କବିତା କାହିଁକି? ପ୍ରଶ୍ନ ଉଠିପାରେ। ତେବେ କବିତାଗୁଡ଼ିକ ଗୋଟିଏ କାଳଖଣ୍ଡରେ ବିଭିନ୍ନ ସମୟ, ପରିସ୍ଥିତି, ପରିବେଶ ଓ ପ୍ରତିକ୍ରିୟାରୁ ଜାତ, ଯଦିଓ ସବୁରି ଅନ୍ତଃସ୍ୱର ଆମକୁ ସମାନ ମନେହୋଇପାରେ। ସତକୁ ସତ କହିବାକୁ ପଛଘୁଞ୍ଚା ଦଉଥିବା, ଅନ୍ୟାୟକୁ ସ୍ୱୀକାର କରିବାକୁ ରାଜି ନଥିବା, ଅତ୍ୟାଚାରକୁ ଚଳଣି କହି ଏଡ଼େଇ ଯାଉଥିବା ସମାଜ ନାରୀର ସେଇ ସତ ଲେଖିବାକୁ କେଡ଼େ ଚତୁରତାରେ ନାରୀବାଦ ନାଁ ଦିଏ। ତେବେ ବାଦ ଯାହା ହେଉନା କାହିଁକି, ଏସବୁ କବିତା ଯେ ନାରୀ ଜୀବନର ଅନ୍ଧାରୀ ଅନୁଭବ ଓ ଆର୍ତ୍ତିର୍ର କଥା କହେ, କବିତାଗୁଡ଼ିକ ପଢ଼ିଲେ ଜଣାପଡ଼େ। ଗାୟତ୍ରୀବାଳା ପଣ୍ଡାଙ୍କ ଏହି ସଂକଳନଟି ନାରୀତ୍ୱର ପ୍ରତିଷ୍ଠା ଦିଗରେ ଏକ ମାଇଲଖୁଣ୍ଟ ହେବ, ସନ୍ଦେହ ନାହିଁ।