କାଞ୍ଚନ ମଲ୍ଲିକ ଏଇ ଗଳ୍ପସଂକଳନ ସହ ଓଡ଼ିଆ ସାହିତ୍ୟରେ ପ୍ରବେଶ କରୁଛନ୍ତି ସତ, ହେଲେ ତାଙ୍କ ଭିତରେ ଲେଖାଲେଖିର ତାଡ଼ନା ଅନେକ ଦିନରୁ। କିଛି ସ୍ମୃତି ତାଙ୍କୁ ଶୁଆଇ ବସାଇ ଦିଅନ୍ତିନି, କିଛି ଘଟଣା ବାରଂବାର ତାଙ୍କ ଏକ୍‍ଲାପଣକୁ ଝୁଣିବିଦାରି ପକାନ୍ତି ଓ ସେଥିରୁ ରକ୍ଷା ପାଇବାକୁ ଯାଇ ସେ ବାଛିନେଇଛନ୍ତି ଏଇ ଗଳ୍ପର ଜାଲ। ମୁଣ୍ଡ ଓ ମଗଜରେ ବସା ବାନ୍ଧିଥିବା ଯାବତୀୟ ଚରିତ୍ର ଓ ଘଟଣାକୁ ସେ ଗଳ୍ପର ଜାଲରେ ଅକ୍ତିଆର କରି ପୋଷା ମନେଇବାରେ ଲାଗିଛନ୍ତି। ପ୍ରେମ, ସଂପର୍କ ଓ ବାସ୍ତବତା ଭିତରଦେଇ ଯାଇଥବା ଜୀବନର ରାସ୍ତାକୁ ସେ ପାରିହେଉଛନ୍ତି ଗଳ୍ପର ହାତଧରି। ‘ତୁମେ ଠିକ୍‍ ବର୍ଷା ପରି’ ଯଦିଓ କାଞ୍ଚନ ମଲ୍ଲିକଙ୍କର ପ୍ରଥମ ଗଳ୍ପ ସଂକଳନ, କାହାଣୀ ଗଠନର କଳା ଓ କାରିଗରୀରେ ସେ କିନ୍ତୁ ବେଶ୍‍ ପୋଖତ। ତାଙ୍କ ଗଳ୍ପର ସବୁଠୁ ଉଲ୍ଲେଖନୀୟ ଗୁଣ ହେଲା ବିଶ୍ୱସନୀୟ ନିରୀହତା। ସେଇ ନିରୀହତା ତାଙ୍କୁ ପାଠକଙ୍କ ନିକଟରେ ଅଧିକରୁ ଅଧିକ ସୁପରିଚିତ କରାଇବ, ଏ ବିଶ୍ୱାସ ମୋର ରହିଛି।